Habari Zilizopo Katika Magazeti ya Leo Alhamisi ya Septemba 28
Kigwangala Aiagiza TAKUKURU Kumkamata Tabibu kwa Kutafuna Milioni 2 za CHF
Kigwangala Aiagiza TAKUKURU Kumkamata Tabibu kwa Kutafuna Milioni 2 za CHF
Naibu Waziri wa Afya, Dk Hamisi Kigwangalla ameiagiza Taasisi ya Kuzuia na Kupambana na Rushwa (Takukuru) kumkamata tabibu, Daniel Mtatiro wa kituo cha afya Kiagata anayetuhumiwa kula Sh2 milioni za Mfuko wa Afya ya Jamii (CHF).
Dk Kigwangalla aliye katika ziara mkoani Mara amekagua zahanati, vituo vya afya na hospitali ikiwa ni katika mpango wa kuboresha sekta ya afya.
Baada ya kufanya ziara katika kituo hicho cha afya, Dk Kigwangalla amemwagiza Mkurugenzi Mtendaji wa Halmashauri ya Butiama mkoani Mara, Simon Ngiliule kumsimamisha kazi mara moja kutokana na tuhuma hizo.
Pia, ameiagiza Takukuru kumkamata tabibu huyo ili kuhojiwa na kuchukuliwa hatua.
"Nakuagiza mkurugenzi msimamishe kazi Mtatiro na afikishwe Takukuru haraka sana. Huku ni kuhujumu mpango wa Serikali wa kuwaletea maendeleo kupitia afya matokeo yake mtu mmoja anachukua fedha za wananchi mwishowe wanakosa matibabu," alisema Dk Kigwangalla.
Utetezi wa Serikali Kuhusu kesi ya mamlaka ya wakuu wa mikoa na wilaya Kuwaweka Watu Mahabusu kwa saa 48
Utetezi wa Serikali Kuhusu kesi ya mamlaka ya wakuu wa mikoa na wilaya Kuwaweka Watu Mahabusu kwa saa 48
Mwanasheria Mkuu wa Serikali (AG), amewasilisha utetezi dhidi ya kesi ya kupinga mamlaka ya wakuu wa mikoa na wa wilaya kuamuru watu kuwekwa ndani kwa saa 48, kama ilivyoagizwa na Mahakama Kuu Kanda ya Dar es Salaam.
Pamoja na maelezo ya utetezi, Serikali pia imewasilisha pingamizi la awali dhidi ya kesi hiyo ikiiomba Mahakama iitupilie mbali hata kabla ya kuisikiliza.
Kesi hiyo ya Kikatiba namba 16 ya mwaka 2017 imefunguliwa na mwanasheria wa kujitegemea, Jebra Kambole dhidi ya AG, akidai ni kutokana na kukithiri kwa matukio ya wakuu wa mikoa na wilaya kuamuru watu kuwekwa mahabusu kwa saa 48.
Mwanasheria huyo anahoji uhalali wa vifungu vya 7 na 15 vya Sheria ya Tawala za Mikoa Sura 97 ilivyorekebishwa mwaka 2002 vinavyowapa wakuu hao wa mikoa na wa wilaya mamlaka hayo, akidai vinatumiwa vibaya bila kujali mipaka, sababu, wala bila fursa ya kumsikiliza.
Kambole ambaye anawakilishwa na Kituo cha Sheria na Haki za Binadamu (LHRC) na Chama cha Wanasheria wa Tanganyika (TLS), anaiomba Mahakama itamke kuwa vifungu hivyo vinakiuka haki za binadamu zinazotolewa na Katiba ya nchi.
Amezitaja haki zinazokiukwa kutokana na utekelezaji wa vifungu hivyo kuwa ni uhuru wa kujieleza, usawa mbele ya sheria, utu na haki ya mtu kuwe huru na kwenda mahali kokote atakako kinyume cha ibara za 12, 13(6)(a)(b)(e), 15 na 29 (1) za Katiba.
Hata hivyo, Mwanasheria Mkuu wa Serikali katika majibu yake amesema vifungu hivyo havikiuki haki hizo zinazotolewa na Katiba ya nchi bali vinaenda sambamba na Katiba.
Pia, ameweka pingamizi la awali akiiomba mahakama iitupilie mbali kesi hiyo.
Katika sababu zake za pingamizi la awali, anadai kesi hiyo haileweki na ni batili kisheria kwa kuwa inakiuka kifungu cha 4 na cha 8 cha Sheria ya Utekelezaji wa Wajibu na Haki za Msingi na kwamba haina maana na ni ya kuudhi.
Pia, anadai kiapo kinachounga mkono hati ya maombi ya faragha hakina mashiko kwa sababu kinakiuka Amri XIX ya Sheria ya Mwenendo wa Mashauri ya Madai.
Katika maelezo yake ya utetezi, pamoja na mambo mengine anadai vifungu hivyo vinatoa utaratibu mzuri kwa wakuu wa mikoa na wa wilaya wa kutekeleza majukumu yao kwa mujibu wa sheria.
Anabainisha kuwa, vifungu hivyo vinawapa wakuu wa mikoa na wa wilaya mamlaka kwa mambo yanayohusu uvunjifu wa amani na utulivu kwa umma pale uvunjifu huo unapokuwa hauwezi kuzuiliwa kwa njia nyinginezo zaidi ya kumweka kizuizini mtu husika.
Anadai makosa yote yanachunguzwa, yanashtakiwa na kushughulikia kwa mujibu wa masharti ya Sheria ya Mwenendo wa Mashauri ya Jinai, isipokuwa tu pale ambapo sheria inaelekeza vinginevyo.
AG anadai masuala yanayohusu dhamana chini ya Sheria ya Tawala za Mikoa yanaongozwa na Sheria ya Mwenendo wa Mashauri ya Jinai.
Dereva wa Dangote na Waethiopia 8 Wafikishwa Mahakamani
Dereva wa Dangote na Waethiopia 8 Wafikishwa Mahakamani
Watanzania watatu akiwamo dereva wa kampuni ya saruji ya Dangote, Khalid Abdallah na wahamiaji wanane raia wa Ethiopia wamefikishwa katika Mahakama ya Hakimu Mkazi Kisutu wakikabiliwa na mashtaka matano.
Miongoni mwa mashtaka yanayowakabili ni kusafirisha kwa magendo binadamu na kuingia nchini kinyume cha sheria.
Mwendesha Mashtaka wa Uhamiaji, Novatus Mlay amewasomea mashtaka hayo leo Jumatano mbele ya Hakimu Mkazi Mwandamizi, Victoria Nongwa.
Baada ya kusomewa mashtaka, raia hao wa kigeni wamekubali makosa yote yanayowakabili, huku Watanzania wakikana.
Raia hao wa Ethiopia, Solomon Ertiso, Gazahegn Tiroro , Haire Latso, Thadius Lilanso, Dawit Habtam, Deznet Godebo, Feraru Gurana na Elioj Akola wanadaiwa Septemba 20 katika eneo la Kongowe wilayani Temeke walikamatwa wakiingia nchini bila ya kuwa na kibali.
Kwa upande wao, Khalid Abdallah ambaye ni dereva wa kampuni ya Dangote; Hussein Hamad Hassan na Jumanne Mtambo wanadaiwa Septemba 20 eneo la Kongowe wakiwa raia wa Tanzania walikutwa wakiwasafirisha wahamiaji hao haramu kimagendo.
Wanadaiwa waliwasafirisha wahamiaji hao kwa kutumia gari mali ya kampuni ya Dangote kwa kuwatoa Tanzania kwenda nchini Afrika Kusini.
Pia, wanadaiwa kuwaingiza ndani ya Jamhuri ya Muungano wa Tanzania raia hao wa Ethiopia. Washtakiwa wamekana mashtaka.
Hakimu amewataka kuwa na wadhamini wawili kila mmoja ambao watasaini bondi ya Sh50 milioni kila mmoja. Kesi itatajwa Oktoba 10 na upelelezi imeelezwa haujakamilika. Walishindwa kutimiza masharti hayo hivyo wamepelekwa rumande.
Kwa upande wa raia wa Ethiopia, Mahakama imesema watasomewa maelezo ya awali Oktoba 10.
Wakati huohuo, raia 31 wa Ethiopia na wawili wa Tanzania wamepandishwa kizimbani mahakamani hapo wakikabiliwa na mashtaka matano ya kuingia nchini kinyume cha sheria.
Raia hao wa kigeni walikubali mashtaka na watasomewa maelezo ya awali Oktoba 11.
Watanzania Ibrahim Abdallah ambaye ni dereva wa gari aina ya Nissan Civilian na kondakta Christopher Steven wanadaiwa Septemba 25 eneo la Toangoma wilayani Temeke walikutwa wakiwasafirisha raia hao wa Ethiopia kimagendo kutoka Tanzania kwenda Afrika Kusini.
Washtakiwa walikana shtaka na upande wa mashtaka ulidai upelelezi haujakamilika. Kesi itatajwa Oktoba 11. Washtakiwa wamepelekwa rumande kwa kushindwa kutimiza masharti ya dhamana.
Maalim Seif Azungumzia Alivyomkuta Tundu Lissu Nairobi
Maalim Seif Azungumzia Alivyomkuta Tundu Lissu Nairobi
Katibu Mkuu wa Chama cha Wananchi (CUF), Maalim Seif Sharif Hamad, ameeleza maendeleo ya afya ya Mbunge wa Singida Mashariki, Tundu Lissu (Chadema), baada ya kumtembelea hospitalini Nairobi, Kenya.
Akihojiwa na Redio ya Idhaa ya Kiswahili Deutsche Welle (DW) ya Ujerumani jana, Maalim Seif alisema Lissu anaendelea vizuri na hajapoteza mwelekeo.
“Jana (juzi) nilimtembelea Lissu na nilipata moyo sana, kwa kweli anaendelea vizuri ukizingatia mtu ambaye alipigwa risasi zaidi ya 30, anapata nafuu haraka haraka.
“Bado hajapoteza mwelekeo akili yake ipo timamu, ametuhakikishia haya yaliyotokea hayatamrudisha nyuma katika kuwatetea wanyonge.
“Anazungumza vizuri, yuko makini sana anajua anachokisema na mimi nimepata moyo jinsi nilivyomuona,” alisema Maalim Seif.
Alisema kutokana na mambo yanayoendelea nchini, lazima kuwapo na mjadala wa taifa kuona tumekosea wapi na kujirekebisha.
“Mambo kama haya kutokea Tanzania ni jambo ambalo kila Mtanzania lazima aingiwe na wasiwasi kwa sababu hakuna hata mmoja na hasa mwanasiasa ambaye ana usalama wa maisha yake.
“Kama taifa tuzungumze kuona tumekosea wapi na kujirekebisha,” alisema.
Kuhusu uchunguzi wa tukio hilo, alisema hata kama vyombo vya dola vya ndani vitafanya si aibu kwa nchi kutafuta msaada kwa wengine.
“Yako mambo mengine yaliyotokea huko nyuma na bado hatujaaambiwa yalikwenda vipi, tunaambiwa tu uchunguzi unaendelea. Ni vizuri wananchi waone matokeo ya uchunguzi huo…si aibu kwa nchi kutafuta msaada kwa wengine,” alisema.
Lissu alipigwa risasi zinazokadiriwa kufikia 32, Septemba 7, mwaka huu, alipokuwa akirejea nyumbani kwake Area D mjini Dodoma baada ya kutoka kuhudhuria kikao cha Bunge na kujeruhiwa vibaya sehemu mbalimbali za mwili wake.
Mwigulu: Aliyemtisha Nape Kwa Bastola Sio Askari Polisi, Uchunguzi Sakata la Beni Saa Nane Bado Unaendelea
Mwigulu: Aliyemtisha Nape Kwa Bastola Sio Askari Polisi, Uchunguzi Sakata la Beni Saa Nane Bado Unaendelea
Waziri wa Mambo ya Ndani ya Nchi, Mwigulu Nchemba, amesema aliyemtishia bastola aliyekuwa Mbunge wa Mtama, Nape Nnauye, hakuwa askari.
Amesema kijana hiyo alikuwa ni mhalifu aliyetumia nafasi ya mkutano wa Nape na waandishi habari kutaka kutekeleza tukio hilo ambapo aliishia kumtishia bastola.
“Awali tulidhani yule kijana ni polisi lakini hakuwa na sare za polisi, cha kwanza nilimuelekea Inspekta Jenerali wa Polisi (IGP) kufuatilia na akaleta majibu kuwa hakuwa polisi,” amesema Mwigulu akihojiwa na Kituo cha Televisheni cha Clouds leo.
Aidha, amesema suala la aliyekuwa msaidizi wa Mwenyekiti nwa Chama cha Demokrasia na Maendeleo (Chadema), Freeman Mbowe, Ben Sanane ni ngumu kulisemea kwamba amefariki au yuko kwani polisi bado wanaendelea na uchunguzi.
“Kwa aina ya taarifa ninazopata ni kama inaelekea kufikia ukomo ni jambo ambalo tumelipa uzito kulifanyia kazi na Mtanzania yeyote mwenye nia njema anaweza kutusaidia kufuatilia,” amesema.
Moto Wateketeza Nyumba za POLISI Jijini Arusha
Moto Wateketeza Nyumba za POLISI Jijini Arusha
Takribani familia 13 zenye jumla ya watu 44 za Polisi zimekosa makazi baada ya nyumba walizokuwa wakiishi kuteketea kwa moto jana usiku majira ya saa moja.
Nyumba hizo wanazoishi polisi zilizopo katika kata ya Sekei Jijini Arusha zimeeketea kwa moto na chanzo cha ajali hiyo kutajwa kuwa ni hitilafu ya umeme.
Mkuu wa Kikosi cha Zimamoto na Uokoaji mkoani Arusha, Andrew Komba alieleza kuwa kama siyo taarifa kuchelewa kulifika jeshi la zima moto, basi huenda wangeweza kuokoa mali nyingi zaidi.
“Tungefika mapema nusu ya nyumba zilizoteketea tungeziokoa,” amesema Komba.
Aidha Mkuu wa Mkoa wa Arusha, Mrisho Gambo ambaye naye alifika katika eneo la tukio alilipongeza Jeshi la zima moto kwa juhudi kubwa walizozifanya kuuzima moto huo na kuokoa maisha ya watu pamoja na mali.
“Kuna Nyumba za watumishi wetu askari zimepata ajali ya kuungua moto. Nichukue fursa hii kuwapongeza jeshi la zima moto kwa juhudi kubwa ya kuhakikisha kuwa wamezima moto huu. Takribani familia 13 zimeathirika kutokana na ajali hii ambazo zina watu kama 44….. Taarifa za awali zinaeleza kuwa ajali hii imetokana na hitilafu ya umeme..,” alisema RC Gambo.
Naye Kamanda wa Polisi Mkoa wa Arusha, Charles Mkumbo amesema kuwa tukio hilo ni janga, hivyo watakaa kuona ni kwa namna gani watawasaidia walioathiriwa.
Polisi Amuua Mkewe kwa Risasi na Kisha na Yeye Kujitandika Risasi
Polisi Amuua Mkewe kwa Risasi na Kisha na Yeye Kujitandika Risasi
Askari Polisi Stephen Mungai Kinuthia wa jimbo la Nakuru nchini Kenya, amemuuwa mkewe kwa kumpiga risasi kichwani na kisha kujiua mwenyewe mbele ya mtoto wao ambaye alishuhudia tukio zima.
Kinuthia ambaye alikuwa skari polisi wa kituo cha Molo, amempiga risasi mpenzi wake huyo mara tatu kwa kutumia bunduki ya AK47 wakiwa nyumbani kwao.
Shuhuda wa tukio hilo ambaye ni mlinzi wa eneo hilo amesema walisikia kelele za watu wakilumbana, na walipokuwa wakikimbilia kujua kulikoni walisikia milio ya risasi na kisha kukawa na ukimya.
Majirani wa eneo hilo wamesema walisikia kelele za mtoto akilia kwa sauti huku akisema baba anamuuwa mama.
OCPD wa Nakuru Joshua Omukatta amesema wanaendelea na uchunguzi wa tukio hilo, huku miili ya marehemu wote ikiwa imepelekwa katika hospitali ya serikali ya Nakuru.
Serikali yawapa msaada askari waliounguliwa nyumba
Serikali yawapa msaada askari waliounguliwa nyumba
Serikali kupitia wakala wake wa ujenzi nchini (TBA) imetoa msaada wa nyumba kwa askari polisi waliounguliwa nyumba zao hapo jana, mpaka pale watakapopata makazi rasmi.
Taarifa hiyo imetolewa na Kamanda wa Polisi mkoa wa Arusha Charles Mkumbo , ambapo amesema baada ya ajali hiyo askari hao walikosa mahali pakuishi, hivyo wanaishukuru TBA kwa msaada huo.
"Ule moto umeteketeza kila kitu kabisa, hivyo wale askari hawakuwa na sehemu ya kuishi, jana tuliwahifadhi kwenye bwalo letu la polisi, lakini leo wamepatiwa msaada na wakala wa ujenzi wa serikali (TBA ), wamepewa nyumba za kuishi kwa muda hadi pale watakapopatiwa makazi rasmi, tunashukuru kwa hilo", amesema Kamanda Mkumbo.
Tukio la kuteketea kwa nyumba hizo limetokea usiku wa Septemba 27 mwaka huu majira ya saa mbili na kuteketeza nyumba hizo, lakini jeshi la zimamoto liliwahi eneo la tukio na kutoa msaada kwa wananchi ambao walianza kuzima.
Mwigulu: Tunamsubiri Tundu Lissu Apone ili Atusaidie Kukamilisha Upelelezi
Mwigulu: Tunamsubiri Tundu Lissu Apone ili Atusaidie Kukamilisha Upelelezi
Waziri wa Mambo ya Ndani ya Nchi, Mwigulu Nchemba amezungumzia uchunguzi wa tukio la kushambuliwa na kujeruhiwa kwa risasi mbunge wa Singida Mashariki (Chadema), Tundu Lissu akisema anaamini akipona atatoa mchango mkubwa katika upelelezi.
“Lissu tunamuombea akishapona atatupa mchango mkubwa wa kusaidia uchunguzi, mtu akiwa kwenye maumivu makali huwezi kumuuliza lolote,” amesema Mwigulu akizungumza leo Alhamisi katika kipindi cha Clouds 360.
Amesema kutokana na upya wa uhalifu wa aina iliyotokea kwa Lissu, kuna mambo wanaendelea kuyafuatilia ambayo hawezi kuyaeleza kwa sasa.
“Suala la Lissu kutokana na upya wake, kuna vitu tunaendelea kuvifuatilia, hivyo kuna mambo hatuwezi kuyasemea,” amesema.
Amewataka Watanzania waendelee kuwa na subira kwa kuwa kazi inaendelea kufanyika.
Mwigulu amesema baada ya tukio la kushambuliwa Lissu Septemba 7, taarifa kadhaa zilichukuliwa eneo la tukio ambazo zinaendelea kufanyiwa kazi ili kupata undani wake.
“Wahalifu hawajakamatwa wote, ukianza kusema itakuwa ni shida, kuna mambo yanaendelea kufanywa na hayana ukomo. Ukomo utafikiwa endapo wote waliohusika watakamatwa. Nikisema naweza kuvuruga kazi inayoendelea,” amesema.
Akijibu swali la mtangazaji wa kipindi hicho kuwa watu wanahoji kwamba askari wanapouawa wahalifu wanakamatwa mapema Mwigulu amesema, “ Watu wakiwaza hivyo watakuwa wanakosea, hatuweki madaraja, ni mazingira ya tukio tu.”
Akizungumzia uchunguzi unaoendelea kuhusu kuvamiwa kwa Lissu amesema hawezi kueleza waliokamatwa bali tayari kuna magari zaidi ya 10 yanayofanana na lililohusika kwenye tukio yamekamatwa.
Mwigulu amesema alimuona Lissu siku ya tukio Septemba 7 akiwa katika Hospitali ya Rufaa Dodoma na baadaye uwanja wa ndege aliposafirishwa kwa ajili ya matibabu jijini Nairobi nchini Kenya ambako yuko hivi sasa.
Amesema hajafika Nairobi kumjulia hali Lissu bali kwa Mkoa wa Singida, Mbunge wa Singida Kaskazini, Lazaro Nyalandu amefika.
“Katika mazingira mengine tunaendelea kupata taarifa, kama Serikali tuna balozi, kama waziri kwenda kumuona ni jambo jema katika utaratibu wa uchunguzi hata dereva tutazungumza naye,” amesema.
Amesema dereva hivi sasa anapata tiba ya kisaikolojia na anaamini atakapokuwa tayari atazungumza na wanaokusanya taarifa.
Wahadzabe Waiomba Serikali Iwapatie Tani 2 za Bangi
Wahadzabe Waiomba Serikali Iwapatie Tani 2 za Bangi
Jamii ya Wahadzabe wanaojishughulisha na uwindaji, kurina asali na kukusanya matunda porini, wameomba kupelekewa msaada wa bangi angalau tani mbili watakayoitumia kwa mwaka mmoja.
Wahadzabe wanaokadiriwa kufikia 500 ni jamii inayoishi porini maeneo ya Endamaghan, Kandeni Tarafa ya Eyasi Wilaya ya Karatu mkoani Arusha.
Jamii hiyo, bado inakabiliwa na umasikini licha ya kuwa kivutio cha watalii katika Ziwa Eyasi.
Ombi hilo walilitoa juzi katika Kijiji cha Endamaghan, wakati walipotembelewa na timu ya wataalamu kutoka serikalini iliyoteuliwa kuandaa mapendekezo ya muundo wa kipindi cha pili cha mpango wa kunusuru kaya masikini unaotekelezwa na Mfuko wa Maendeleo ya Jamii (TASAF).
Akizungumza na Gazeti la Mtanzania katika eneo la makazi yao yenye nyumba za asili za nyasi zilizoonekana kuwa wazi kutokana na kufunikiwa na nyasi kidogo, Mwenyekiti wa jamii hiyo, Julius Ndaya alizitaja sababu alizodai ni za msingi za kuomba wapelekewe bangi.
Alisema shughuli za kutembea kutafuta wanyama kwa ajili ya kitoweo huwalazimisha kutembea umbali mrefu kiasi cha kilomita 50, kazi ambayo huwa ni sehemu ya majukumu ya mwanamume katika jamii hiyo.
“Kiasi hiki cha tani mbili kinaweza kututosha watu kama 100 au 200 kwa miezi 6, tunavuta bangi si kama ambavyo wengine au Serikali wanafikiria kwamba tunaweza kusababisha vurugu, kuvunja nyumba za watu, kuiba wala kugombana na jamii nyingine, hapana.
“Mmea huu tumeukuta babu zetu wakiwa wanauvuta wameturithisha, tunaendelea kuvuta bila kuwa na madhara yoyote. Hii ni sehemu ya kiburudisho kwetu, huku porini hatunywi pombe hii ndio pombe yetu. “Ikiwezekana turuhusiwe kulima angalau bustani za bangi lakini changamoto kubwa tunayokutana nayo ni pale Serikali inapopiga marufuku zao hili kwa madai kuwa ni sehemu ya dawa za kulevya,” alisema Ndaya.
Kiongozi wa jamii hiyo alikwenda mbali na kueleza pindi wanapovuta bangi huchangamsha akili na miili yao, hivyo hujikuta wakipiga hadithi za matukio ya uwindaji porini au namna walivyokabiliana na au kukurupushana na wanyama wakati wa uwindaji.
Katika eneo la jamii hiyo lenye nyumba za asili za nyasi zikiwa zimezungukwa na mafuvu ya wanyama pori na miti mikubwa, lilikuwa na wanawake watu wazima walionekana wamekaa kwenye makundi pamoja na vijana wa kiume wakiendelea kuvuta bangi.
Akifafanua kuhusu maombi ya Wahadzabe kuomba tani mbili za bangi, Mkuu wa Wilaya ya Karatu, Theresia Mahongo alisema Serikali haiwezi kukubaliana na maombi hayo.
“Hata sasa walikuwa wakiniomba, majuzi tuliteketeza kiasi kama cha hekari tano za bangi maeneo ya milimani, kwa hiyo kwa sasa hawaipati inawaumiza zaidi.
“Kikubwa tunaendelea kuwapatia elimu kwamba bangi kwao si kitu kizuri, tutatafuta mbadala na kwa vile wameniomba nikutane nao hilo nalo tutaliweka vizuri.
“Naamini vipo vitu mbadala wanavyoweza kutumia badala ya bangi, mnawaona wanalalamika kwa sababu hawaipati. Tunajua ni wawindaji wanakimbia na kupita maeneo magumu ndio maana wanaihitaji ili iwatoe nishai, ukweli ni kwamba jambo hilo hatuwezi kuliruhusu,” alisema.
Wakati watu hao takribani 200 kutoka jamii ya Kihadzabe wakiomba kupelekewa tani mbili za bangi, katika siku za hivi karibuni baadhi ya wabunge waliomba zao hilo liruhusiwe kuwa la kibiashara ili kuwaongezea kipato zaidi wakulima na wauzaji wa bangi.
Chakula kikuu cha jamii hiyo ni mizizi, matunda pori, asali na nyama huku asali ikiwa ni miongoni mwa vitu vinavyopendwa zaidi na jamii hiyo.
Namna wanavyoitumia mizizi hiyo kwa chakula; wanakula kama ilivyo au kuichoma na ladha yake ni kama muhogo au viazi na mizizi hiyo huwa na ukubwa kama wa mguu wa mtu mzima.
Matunda yao makuu ni kwantlanabe, kalahar, kongolobi na ubuyu ambayo husagwa kwenye jiwe na unga wake husongwa kama ugali na kuchanganywa na asali.
Vyakula vyao vinavyotegemea asili yao haviwapi fursa ya kutumia mafuta, nyanya, kitunguu, sukari au kutumia vinywaji vya viwandani, isipokuwa chumvi.
Wanyama wanaopendwa zaidi na Wahadzabe ni pofu, nyani, tumbili, digidigi na twiga.
Mwigulu Nchemba Aizungumzia Gari Iliyokuwa Ikimfatilia Tund Lissu Jijini Dar
Mwigulu Nchemba Aizungumzia Gari Iliyokuwa Ikimfatilia Tund Lissu Jijini Dar
Waziri wa Mambo ya Ndani ya Nchi, Mwigulu Nchemba, amesema gari ndogo ambayo Mbunge wa Singida Mashariki, Tundu Lissu, alidai lilikuwa likimfuatilia maeneo mbalimbali jijini Dar es Salaam, iko Arusha na haijawahi kutumika Dar es Salaam.
Mwigulu amesema leo kuwa baada ya polisi kufuatilia gari hiyo wamegundua iliyokuwa inamfuatilia Lissu ilikuwa na namba batili huku gari halisi yenye namba hizo za usajili ikiwa Arusha.
“Utoaji wa taarifa na wenyewe haukuwa rasmi kwa mfano Lissu aliposema kuna gari inamfuatilia nilielekeza polisi wakaifuatilia ikakutwa Arusha kuna gari ndogo ya namba hizo kwa hiyo kuna moja iliweka namba batili.
“Ile gari ilikutwa kule kule na haikuwa na ruti ya huku (Dar es Salaam) huwa iko kule kule, kwa hiyo kwenye mambo haya ndiyo maana tunahitaji sana ushirikiano.
“Natamani watu hawa tungewatia nguvuni pale pale ningepewa ‘tip’ mapema tungefuatilia hili na kitendawili cha watu wasiojulikana tungekitegua mara moja,” amesema Mwigulu akihojiwa na Kituo cha Televisheni cha Clouds, leo.
Pamoja na mambo mengine amesema Lissu mwenyewe anaweza kusaidia uchunguzi katika tukio hilo ambapo pia ameonya watu watu wanaotengeneza matukio ya aina hiyo kufikiria madhara yanayoweza kutokea baada ya tukio.
